ROSTOCHIUM

ROSTOCHIUM

quod olim Lacinium, et corrupte Rhdopolis et Laciburgium vocitatum, urbs est Vandalica Anseatica, maritima, et Megapolitana, et prae multis aliis Germaniae, cuius haec ad Boream limes, urbibus praecipuis, literariô simul et mercatoriô emporiô clarissima. Megapoleos Principibus semper paruit, a quorum maioribus, circa epochae Christianae annum 329. levibus initiis, instar pagi, ad Varnam amnem condi incepta, et postea a Godescalco, Obotritarum rege, in oppidulum conversa, ac demum ann. 1160. a Primislao secundo, Nicolotti filio, et Obotritarum seu Herulorum rege quadragesimo et ultimo, ex vicinae, et tum ab Henrico Leone desolatae urbis Kessini ruderibus, murô cincta, fossis munita, inque urbis formam instaurata est. Nomen urbis Vandalicum est, divisionem seu dissolutionem aquarum significans, et Rostzoch, vel Rotzoch olim fuit appellatum, ut Poloniae Historiographi, qui terram uliginosam vocabulum illud interpretantur, et sigillum urbis maius adhuc attestantur: alii a vicino urbi Rosarum horto, et fragrantibus rosis nomen deducunt, ut esset Rostock, quasi Rosenstoch: alii alias vocabuli comminuscuntur interpretationes. Rostochiensem, ditionem occupavit Ericus VI. Danorum Rex A. C. 1286. sed Christophorus III. Erici VII. successor eam Megapolitano Principi restituit, A. C. 1322. Valdemarus item IV. Alberto Megapolitano tractum hunc contulit, A. C. 1360. Partes urbis tres sunt, Antiqua, quae tribus templis, nimirum D. Petri. D. Nicolai. et D. Catharinae, nec non Iurisconsultorum collegiô insignis est. Media, quae brachiô Varnae ab antiqua separata, templis D. Mariae, D. Iohannis, nec non Curiâ et Graphaeô, pulcherrimisque aedificiis et civium flore resplendet: Et Nova, quae collegiata D. Iacobi Ecclesia, tribusque aliis Spiritui Sancto, D. Michaeli, et S. Cruoi dicatis templis, nec non Academiae a Iohanne filiô Magni, et patruele eius Alberto, Ducibus Megapolitanis fundatae A. C. 1415. sed plene demum introductae, A. C. 1419. a Ioh. Alberto vero et Ulrico postea dotatae, Collegiis octo exornatur. Longitudo urbis 2166. passuum est, latitudo 825. ambitus 5500. si passum ulnae aequipares: ac parum distat longitudine suâ ab Imperiali Lubeca, quae 2150. passus longa, et 1300. ferme lata est. Metel. Frequentibus seditionum motibus et incendiô, aliisque malis saepius est devastata. Inter alia enim, ortô dissidiô inter cives et Senatum, cum Caesar causae disceptationem Ioh. Alberto Duci, qui Principatum omnem ad normam August. Confess. reformaverat, mandâsset, ipse armatus in urbem intromissus, Senatum gravius habuit, arxque, quae exstrueretur, designata est, A. C. 1573. Iterum res ad bellum spectavit, civibus se adversus arcem palis ligneis munientibus, Megapolitanis autem, quos Dani iuvabant, portum obsidentibus, donec interventu Nobilitatis lite compositâ cives Principi iurârunt. Ut recentiora omittam. Hîc Georgius Rikenius Pastor, Resormatis Mariâ apud Anglos dominante in exilium inde eiectis et hospitiô Rostochii excipi petentibus acerrime se opposuit, circa A. C. 1554. Vide Rhodopolis.